Serie

„Goorn un Planten bedüüt Dynamik“

Al een Seggwiesen ut China seggt: „Dat Leven fangt an mit den Dag, do du‘n Goorn anleggen deist.“ Dat is wohr, denn beter kannst du di gor nich verhalen as in‘n egen Goorn. För‘n Barg Lüüd is de Goorn de gröne Kamer van dat Huus. Dorum sünd ok de, de‘n Goorn anleggen willt, nich för den Tofall to hebben. Geern nehmt de de Hülp van‘n Experten an. So een „Gartenprofi“ is Elke Kuper, de siet 17 Johrn ehr egen Büro hett un van hier ut vörsleit, up wecke Art un Wies man een Goorn up‘n Weg bringen kann. Hart un Leevde för Planten liggt sotoseggen in ehr Bloot. Upwussen is se in dat lütt Dörp Haarenstroth bi Bad Twischenahn. Ehr Grootvadder harr sülfst een lütt Boomschool, un sien Enkelsche Elke hett em faken hulpen. As se öller wurd, kemen bi ehr anner Saken na vörn. Se maak ehren Schien för dat Seilen, un jümmer woller weer se up dat Twischenahner Meer to finnen, un nich mehr so veel in Opa sinen Goorn. Man de Leevde to de Planten, de weer dor jümmer noch; so hett se sik ok in de Ferien Arbeit in een Goorneree socht. As se ehr Abitur harr, hett se up Goornersche lehrt, un hier de Richt „Baumschule“ inslaan. „Wat anners weer för mi nie nich een Thema. Ok wenn ik in de eersten Weken van mien Lehrtiet na de swore Arbeit poggenmööd na Huus keem, weer dat för mi klor, dat ik up den rechten Padd weer.“ Na de Lehrtiet wull se ne‘e Luft snuppern, un so gung dat van‘t Ammerland na Bayern. Nich wiet van München kunn se in een „Gartencenter“ ehre Hannen rögen. Dat se den Weg na‘n Süden van Düütschland fund, harr ok noch‘n annern Grund. Ehr Fründ un Partner studeer in München up Medizin. Bi ehre ne‘e Arbeitsstää gefull ehr, dat se den Kontakt mit Kunnen harr. Man‘n Haken weer dor denn doch bi: Se moss eerst maal lehrn, mit den bayerisch Dialekt klor to kamen. Elke wull in ehren Beruf mehr as bloots up enen Padd lopen, un so hett se in München up „Forstwirtschaft“ studeert. Dat Studeern harr länger duurt as dat wesen schull, un dat harr twee Gründe, över de man sik freuen kann: In disse Tiet kemen ehr twee Deerns up de Welt. Mit Familje un den Titel „Diplom-Fortwirtin“ gung dat 1992 torüch na Raast (Rastede). To de Tiet wurrn för den Forst ne‘e Lüüd nich instellt, un so hett se bi verscheden Firmen warkelt, de dat mit „Gartenbau“ to doon hefft. Mit dat ne‘e Johrdusend keem bi ehre Arbeit een ne‘en Dreih. In Wardenburg fund se een ne‘e Arbeitsstää in een „Büro für Landschaftsarchitektur“. Wat to planen, dor fund se veel Pläseer bi; so weer dat Planen van Goorns för ehr de ne‘e Richt. „För mi is disse Arbeit as‘n Geschenk. Mit Lüüd, de‘n ne‘en Goorn anleggen willt, dat to besnacken, up wecke Art un Wies wi dissen Goorn up‘n Weg bringen willt, dat maakt bannig veel Spaaß.“, vertellt Elke mit lüchten Ogen. Man dat is ja faken so, ok de Beginn weer bi ehr nich licht to. Överher weer se noch bi de „Niedersächsische Gartenakademie“ in Bad Twischenahn as „Freie Mitarbeiterin“. Middewiel is up Elke Kuper een Barg Arbeit tokamen, bit na Hamborg hen is bekannt, dat in‘t Ammerland een Froo is, de dat bi dat Anleggen van‘n Goorn besünners mit de Kreativität hett. Elke ehr Beruf is ok ehr Hobby, denn veel Tiet nimmt se sik ok noch för ehr‘n egen Goorn. Hier finnt sik Obstbööm, enen Kruutgoorn un – dat versteiht sik – Stauden. Nee in dit Johr is in‘n Vörgoorn de „Blasenstrauch“, een ganz besünner Holt, de dat Ankieken wert is.

Dat Öller:58 Ik wahn in: Rastede/Leuchtenburg Familjenstand: In fasten Hannen – twee Kinner Ik mag geern: Natur un Pflanten, un dorto Kunst un Kultur Opregen do ik mi över: Ungerechtigkeit un Ignoranz An’n leevsten to äten: Swartbroot mit leckern Kääs un dorto‘n Appel Dat kummt mi nich op’n Disch: Melkries Dar fahr ik geern mal heen: Radwannertouren na Litauen und Estland Mien Hobby: Radföhrn, Arbeit in‘n Goorn un Lesen An’n leevsten mag ik höörn: Ich höör allns, dwass döör dat, wat de Musik hergifft Dat Book gefallt mi besunner goot: „Gartenmanifest“ van Henk Gerritsen, un just lees ik „Mädchen, Frau ETC.“ van B.Evaristo Mien gröttste Wunsch: Rejell wat doon för Umwelt und Klimaschutz Dat is mien Snack: „ Geev elkeen Dag de Gelegenheit, de schönste Dag van dien Leven to wesen“ (Mark Twain)

TO’N VERSTAHN
PlattdeutschHochdeutsch
SeggwiesenSprichwort
Seilen segeln
GoornerscheGärtnerin
poggenmööd hundemüde
Pläseer Freude, Spaß
Kruutgoorn Gemüsegarten

 

Liveticker

Weitere interessante Artikel

Piccoplant forschungsstation

Wie feinstes Porzellan: Russischer Flieder von Leonid Kolesnikow

pflanzendecke

Gute Lösung: Immergrüne Bodendecker

nachwuchs

In die Gummistiefel und ab ins Grüne!

gemüse

Kulinarische Geschichte im Beet

gemüse

Bohnen haben 2. Weltkrieg überstanden

Obstbäume

Reiche Blüte reicht nicht aus

Gemeinschaftsgärten in Rastede

Jetzt wird auch in Nethen geackert

Frühjahrsarbeit

Moos im Rasen behandeln

Naturgarten

Salomonssiegel

Neuseeländer

Spinat für die Sommerzeit

Gundermann

Bodendecker wirken lebendig

Folgen des Winters

Notfallhilfe für Pflanzen mit Frostschäden

Sonniger Platz

Tipps für Erdbeeren auf dem Balkon und im Beet

Pflanzentipp

Gladiolen-Knollen jedes Jahr an neuen Ort setzen

Wie bunte Kissen im Garten

Pflegetipps für Polsterstauden