Serie

De rechte Goorn deit wat för Minsch un Deert

Dat seggt us Heike Beening ut Neekamperfehn in Oostfreesland, de geern fraagt ward, geiht dat um dat Aneggen van enen Goorn: „Dat kann ik geneten, wenn dat in‘n Goorn brummt, summt un bleuht!“ Un so weer dat ok al bi ehr as Kind. Upwussen is Heike in dat lütt Dörp Breinermoor (Gemeende Westoverledingen). Ehr Öllern un ehr Grootöllern harrn hier‘n Buurnhoff, un noch vandaag kann se van dissen Dree-Generationen-Huushalt best snacken. „Bi den groten Vörgoorn van usen Hoff kunnst du to de Tiet an enen Park denken. Dat is schaad, ik kenn dissen Park bloots noch döör Biller“, beduurt Heike. Geev dat up‘n Hoff bannig veel to doon, so mossen ok de Kinner mit anpacken. So weer dat nu maal up‘n Land. In den groten Kruutgoorn van ehr Mudder wurd ehr al as lütt Deern een Deel tostüürt. För dissen Deel weer se alleen tostännig. „Besünners stolt weer ik denn in de Tiet van de Arnt. Geern hulp ik mien Mudder un Grootmudder bi dat Inleggen in de Weckglöös, een wunnerbore Tiet“, so kann sik Heike noch geern dor up besinnen. „School is nich allns, dat Leven guntsiet van de School hett ok sien Recht“, weer ehr Snack, un ganz besünners in de Tiet as „Teenager“. As se dat Abitur in der Tasch harr, keem eerstmaal een Lehrtiet in dat Büro van „Auto-Fischer-Reisen“ in Leer. Ok as se disse Lehrtiet achter sik harr, is se eerstmaal bi disse Firma bläven un harr Programme för dat Reisen up‘n Weg brocht. Man up Duur schull dat nu doch nich dat Büro wesen; dat rechte Füür kreeg se nu maal bi Natuur un Goorn. So gung se na Hannover un studeer up „Gartenbau“. Se harr dat Studeern meist achter sik, as se mit ehren Fründ, de vandaag ehr Mann is, na Berlin gung. Na twee Johrn kreeg ehr Mann in Mühlheim an de Ruhr een Arbeitsstää, un in de sülvige Tiet weer ok wat unnerwegens. As de Dochter up de Welt kamen weer, mossen dat Enn van dat Studium un de Diplomarbeit dorto noch kamen. Man se dach eerstmaal an de Familje, un dat anner Projekt moss noch töven. Beide Familjen harrn ehr Tohuus in Oostfreesland, un so gung dat för dat junge Paar torüch in de ole Heimat. Mit ehren Söhn wurd de Familje denn noch eenmaal grötter. Twee lütte Kinner un de Huushalt, dat hett Heike Beening dor nich van afbrocht, nu ennelk ehr Diplomarbeit unner Dack un Fack to bringen. 2006 harr se den Titel „Dipl.-Ing. Gartenbau“ in ehr Tasch. In ehren Beroop wull se vörn an‘e Sprütt blieven, un so hett se jümmer an‘n Vörmiddag in de „gröön Branche“ ehr Hannen röögt, un so ok in dat Rebett „Garten- und Landschaftsbau“. Jümmer woller hett se dat markt, dat ehre Kunnen enen Wiespahl för ehren Goorn hebben wullen, de se to‘n Bispill döör de tokamen Johrn stüren kunn. Nebenbi besoch Heike Beening Seminare un Workshops, se wull bi de „Gartengestaltung“ un bi de „Pflanzenverwendung“ noch wat tolehrn. Mestersche för ehr weer to‘n Bispill Petra Pelz, international bekannt as Fackfroo för „Gartenplanung“. Ne‘e Zertifikate kemen dor för Heike to, un dat is bit vandaag nich anners wurrn. De gröttste Wunsch för ehr weer dat, up egen Been to stahn un Ideen för‘n Goorn umtosetten. Vör veer Johrn hett se dissen Wunsch up‘n Weg brocht. Gau wurd de Firma „Heike Beening Gartenplanung“ best bekannt, un dat nich bloots in Oostfreesland. „De Goorn hett för de Minschen een Bedüden, dat jümmer grötter ward“, freut sik Heike. Nich alleen för ehre Kunnen, de privat oder ok för een Gewerbe ehre Ideen bruukt, is se dor. Se sett ok för de „Niedersächsische Gartenakademie“ un för den „Park der Gärten“ ehr best Been na vörn. In dat vergangen Johr kunn se den „Park der Raritäten“ in Westerstää up de Been stellen. In Heike Beening ehren Kopp sünd jümmer‘n Barg Ideen to finnen; ok in‘n Urlaub blifft se bi elkeen Goorn stahn, de dat Ankieken wert is.

Dat Öller:50 Ik wahn in: Neukamperfehn (Landkreis Leer) Familjenstand: In fasten Hannen – twee Kinner Ik mag geern: Natuur, Goorn un Tohoopkamen mit Frünnen Opregen do ik mi över: Een Mügg, die mi um dat Inslapen bringt An’n leevsten to äten: Van Gröönkohl bit Sushi – (meist) allns Dat kummt mi nich op’n Disch: Mohn un Sellerie Dar fahr ik geern mal heen: Wor dat Wellen un Sünn gifft, un geern in de USA Mien Hobby: Joggen, Fohrradtouren, Yoga un Reisen An’n leevsten mag ik höörn: Bach, „Mucke“ ut de 80er Johrn Dat Book gefallt mi besunner goot: „Die kleinste gemeinsame Wirklichkeit“ van Dr. Mai Thi Nguyen-Kim, („Das große Buch der Gärtnerinnen & Gärtner“ van Anja Birne) Mien gröttste Wunsch: Gesund blieven un tofräden wesen Dat is mien Snack: „Maken is so as willen, bloots bannig däägter“ („Machen ist wie wollen, nur krasser“)

TO’N VERSTAHN
PlattdeutschHochdeutsch
Kruutgoorn Gemüsegarten
inleggeneinmachen
guntsietjenseits
is wat unnerwegens Nachwuchs kündigt sich an
an‘e Sprütt blieven am Ball bleiben
Wiespahl Wegweiser

 

Liveticker

Weitere interessante Artikel

Piccoplant forschungsstation

Wie feinstes Porzellan: Russischer Flieder von Leonid Kolesnikow

pflanzendecke

Gute Lösung: Immergrüne Bodendecker

nachwuchs

In die Gummistiefel und ab ins Grüne!

gemüse

Kulinarische Geschichte im Beet

gemüse

Bohnen haben 2. Weltkrieg überstanden

Obstbäume

Reiche Blüte reicht nicht aus

Gemeinschaftsgärten in Rastede

Jetzt wird auch in Nethen geackert

Frühjahrsarbeit

Moos im Rasen behandeln

Naturgarten

Salomonssiegel

Neuseeländer

Spinat für die Sommerzeit

Gundermann

Bodendecker wirken lebendig

Folgen des Winters

Notfallhilfe für Pflanzen mit Frostschäden

Sonniger Platz

Tipps für Erdbeeren auf dem Balkon und im Beet

Pflanzentipp

Gladiolen-Knollen jedes Jahr an neuen Ort setzen

Wie bunte Kissen im Garten

Pflegetipps für Polsterstauden